پاکستان میں فوڈ پروسیسنگ اور مشروبات کی صنعت کو سب سے زیادہ امید افزا شعبوں میں سے ایک سمجھا جاتا ہے، اور اسے ٹیکسٹائل کی صنعت کے بعد دوسری بڑی صنعت قرار دیا جاتا ہے۔ وسیع امکانات اور وسائل کے ساتھ، پاکستان میں اس شعبے کی حقیقی صلاحیت ابھی تک استعمال میں نہیں آئی۔ وافر زرعی وسائل سے مالا مال، پاکستان کے پاس اپنی فوڈ پروسیسنگ انڈسٹری کو ترقی دینے کے بہت زیادہ امکانات ہیں اگر وہ تازہ پھلوں اور سبزیوں کے تنوع سے فائدہ اٹھائے۔ پاکستان فوڈ ایسوسی ایشن کے ترجمان محمد عمر عمرسن نے ویلتھ پاک کو بتایا کہ حالیہ برسوں کے دوران ملک میں پیکڈ فوڈز اور مشروبات کی فروخت میں نمایاں اضافہ ہوا ہے اور ریستورانوں، فاسٹ فوڈ چینز اور فوڈ ڈیلیوری ایپس کی بڑھتی ہوئی تعداد میں اضافہ ہوا ہے۔ صارفین کے لیے متعدد آپشن فراہم کیے گئے ہیںجس کے نتیجے میں صنعت کی مضبوط ترقی ہوئی۔ عمر سن نے کہاکہ بڑھتی ہوئی شہری کاری اور عالمی رجحانات کے ساتھ، پاکستان میں اخراجات کے انداز بھی بدل رہے ہیں اور گزشتہ چند سالوں کے دوران، ہوٹل اور ریستوراں کا شعبہ زیادہ اخراجات کی فہرست میں سرفہرست ہے۔

انہوں نے کہا کہ فاسٹ فوڈ اور فوڈ سے متعلقہ کاروبار نے ویلیو ایڈڈ پیداوار میں 27 فیصد حصہ ڈالا ہے اور روزگار کے 19 فیصد مواقع پیدا کیے ہیں۔ عمر سن نے کہا کہ پاکستان میں فروزن فوڈ مارکیٹ بھی بڑھ رہی ہے، اور اس کی مالیت 489.51 ملین روپے ہے جس کی بنیادی وجہ یہ سہولتیں ہیں۔پراسیسڈ فوڈ آئٹمز روایتی کھانوں پر برتری حاصل کر رہے ہیں جن میں زیادہ قیمت والی مصنوعات ،مکمل طور پر پکا ہوا کھانا، صحت بخش اسنیکس، ڈریسنگ اور چٹنی، پراسیس شدہ گوشت اور پولٹری شامل ہیں۔ آل پاکستان فروٹ اینڈ ویجیٹیبل ایکسپورٹرز، امپورٹرز اینڈ مرچنٹس ایسوسی ایشن کے سینئر عہدیدار وحید احمد نے ویلتھ پاک کو بتایا کہ فوڈ سیکٹر پروسیسنگ کی سہولیات کی عدم موجودگی، ہنر مند کارکنوں کی کمی اور جدید ٹیکنالوجی کی کمی کا شکار ہے۔ انہوں نے نشاندہی کی کہ 30 فیصد پھل اور سبزیاں غفلت اور پروسیسنگ کی سہولیات کی کمی کی وجہ سے ضائع ہو جاتی ہیں جو کہ فوڈ انڈسٹری کے لیے ایک بڑا چیلنج ہے۔ سماجی و اقتصادی تبدیلی نے ملک میں پراسیسڈ فوڈ کی کھپت کو جنم دیا ہے، اور کیش اینڈ کیری اسٹورز کی بین الاقوامی اور مقامی بڑھتی ہوئی تعداد نے پراسیسڈ فوڈ اور مشروبات کی مارکیٹ کو مزید فروغ دیا ہے۔ پراسیسڈ فوڈ اینڈ بیوریجز کے لیے پاکستان ایکسپورٹ اسٹریٹجی 2023-27 کے مطابق، پراسیسڈ فوڈ اور بیوریجز کی صنعت سے پاکستان کی برآمدی آمدنی محدود اور غیر مستحکم رہی ہے جو کہ 2021-22 میں صرف 574 ملین ڈالر تھی۔صنعت کی بین الاقوامی فروخت نسبتا محدود تعداد میں مصنوعات پر مرکوز ہے جس میں مصالحے، کنفیکشنری، کیک پھل اور سبزیاں شامل ہیں۔

کریڈٹ: انڈیپنڈنٹ نیوز پاکستان-آئی این پی