وفاقی وزیر داخلہ وصوبائی صدر پاکستان مسلم لیگ (ن) پنجاب رانا ثنااللہ خان نے کہا کہ پنجاب میں انتخابات کیس کے حوالے سے اس وقت پورا ملک کشمکش کی کیفیت سے دوچار ہے، اگر مبینہ آڈیو لیک میں صداقت نہیں تو اس کا فارنزک آڈٹ کرالیا جا ئے تاکہ ابہام دور ہو۔فیصل آباد میں میاں قمر عباس رجوکہ کے ڈیرے پر کارکنوں کے اعزاز میں منعقدہ تقریب کے بعد آئی این پی سے گفتگو کرتے ہو ئے انہوں نے کہا کہ مبینہ آڈیو لیک کے حوالے سے کہا جارہا ہے کہ یہ خواتین کی نجی گفتگو ہے، حالانکہ نجی گفتگو صرف خود اپنے تک محدود ہوتی ہے لیکن اگر ملک کے کسی اہم کیس کے حوالے سے بات کی جائے گی تووہ پرائیویٹ بات کیسے ہو گئی؟انہوں نے کہا کہ خاتون اگر کہتیں کہ بیٹا عیدہمارے پاس کریں یاعیدکا تحفہ دینا چاہتیں تو نجی بات تھی۔انہوں نے کہا کہ اس کیس میں جوش کی بجائے ہوش سے کام لینا ہوگا۔رانا ثنااللہ نے کہا کہ71 کے الیکشن نے ملک کو دولخت کر دیاجبکہ77 کے متنازعہ الیکشن سے دہشت گردی نے جنم لیاجس کے نتائج آج تک ملک و قوم کو بھگتنا پڑرہے ہیں۔انہوں نے کہا کہ خاتون دس پندرہ ہزار بندوں کو لاکھوں لوگ بتا رہی ہیں جو غیر جانبداری نہیں بلکہ ایک جماعت کی محبت میں اندھا پن ہے اورپھر کہہ رہی ہیں سارے آپکے لئے دعائیں مانگ رہے ہیں،آپ دعائیں سنیں اور فیصلہ کریں لہٰذایہ سب کیسے پرائیویٹ گفتگو ہو گئی۔

انہوں نے کہا کہ نواز شریف کی حکومت کو ہٹاکر ملک پر ظلم کیا گیا اسلئے عوام دیکھیں کہ جب نواز شریف تھا توقیمتیں مئی 2018 میں کیا تھیں اور جب سے یہ آئے تمام اشیا کی کتنی قیمتیں بڑھتی رہیں۔ انہوں نے کہا کہ ملک کو معاشی طور پر مستحکم کرنے کیلئے ضروری ہے کہ ملک بھر میں ایک ہی وقت میں تمام انتخابات کروائیں جائیں۔وفاقی وزیر داخلہ نے تجویز پیش کی کہ الیکشن کے مسئلہ پرفل کورٹ بینچ بٹھائیں اس کا جوبھی فیصلہ ہوگا ہمیں قبول ہو گا۔انہوں نے کہا کہ عدالت عظمیٰ کا حکم ہے کہ ہر حال میں 14 مئی کوہی الیکشن کروائیں،ہم الیکشن سے نہیں بھاگ رہے،میں اگر الیکشن نہ لڑنا چاہتا تو مجھے ادھر آنے کی کیا ضرورت تھی لیکن میں آپ کو بتادینا چاہتا ہوں کہ الیکشن جب بھی ہونگے ہم اپنی کارکردگی کی بنیاد پر الیکشن لڑیں گے اور جیتیں گے بھی۔انہوں نے کہا کہ تمام اسمبلیوں کے الیکشن ایک ساتھ ہونے چاہئیں کیونکہ اسی میں ہی ملک و قوم کا فائدہ ہے ورنہ جس قسم کے الیکشن کی کوشش کی جارہی ہے اس طرح کے الیکشن ملک کے مفاد میں نہیں ہونگے۔انہوں نے کہا کہ عوام دیکھیں گے کہ الیکشن کے نتیجے میں ہم ہی کامیاب ہونگے۔انہوں نے کہا کہ بد قسمتی سے پچھلے چار سال سے کوئی کام نہیں ہوا،موٹر وے، چلڈرن ہسپتال، ایف آئی سی میں کچھ بھی توسیع نہیں کی گئی بس

انہوں نے چار سال میں نوجوان نسل کو بد تمیز بنایااورسوشل میڈیا پر عزتیں اچھالی ہیں۔انہوں نے کہا کہ انہوں نے حلقہ میں بڑی تعداد میں واپڈا کے منصوبے مکمل کروائے ہیں اورواپڈانے اعلان کیا ہے کہ پورے حلقے میں مزیدبہت کام ہوگااور کوئی علاقہ بجلی کے بغیر نہیں رہے گاجس کے ساتھ ساتھ گیس کیلئے بھی سروے کروایا جا ئے گا اور جہاں جہاں گیس نہیں وہاں گیس فراہم کی جا ئے گا۔رانا ثنااللہ خان نے کہا کہ نتھو چک کے دیرینہ مسائل حل کرنے کیلئے سوئی گیس کی فراہمی اور اضافی آبادیوں کو بجلی فراہم کی جائے گی۔انہوں نے کہا کہ اہل علاقہ کی جانب سے ان کی جس طرح پرزور حمایت کا اعلان کیا گیا ہے وہ اس پر ان کے شکر گزار ہیں۔انہوں نے کہا کہ وہ رجوکہ برادری کے بھی مشکور ہیں جنہوں نے اس شاندار تقریب کا اہتمام کیا۔انہوں نے کہا کہ حمایت کے اعلان پر یقین ہے کہ کھل کر مخالفت کرنے والا ہی کھل کر حمایت بھی کرتا ہے۔انہوں نے کہا کہ جلد ہمارے قائد میاں نواز شریف وطن واپس آئیں گے اور انتخابی مہم کی قیادت کریں گے۔انہوں نے مسلم لیگ (ن) کے قائدین، مقامی رہنماؤں اور کارکنوں سے اپیل کی کہ وہ ابھی سے گلی گلی محلہ محلہ، قریہ قریہ، نگر نگر پھیل جائیں اور اپنی انتخابی مہم کو تیز کریں تاکہ جب بھی الیکشن ہوں فتنہ خان کے سیاسی تابوت میں آخری کیل ٹھونک کر اسے ووٹ کی پرچی کی طاقت سے ہمیشہ ہمیشہ کیلئے سیاست سے آؤٹ کردیا جا ئے۔

کریڈٹ: انڈیپنڈنٹ نیوز پاکستان-آئی این پی