منیلا(شِنہوا) ایشیائی ترقیاتی بینک (اے ڈی بی) کی جانب سے جاری کردہ تازہ ترین آؤٹ لک رپورٹ کے مطابق چین کی معیشت ایشیا اور بحرالکاہل میں ترقی کو تقویت دے رہی ہے اور خطے کی ترقی پذیر معیشتوں کی شرح نمو 4.8 فیصد پر برقرار ہے۔

تازہ ترین ایشیائی ترقیاتی آؤٹ لک (اے ڈی او) نے پیش گوئی کی ہے کہ خدمات کے شعبے میں مضبوط مقامی طلب کے درمیان  چین کی معیشت رواں سال 5 فیصد ترقی کرے گی جو اپریل کی پیش گوئی سے مختلف ہے۔

 منیلا میں قائم بینک نے کہا ہے کہ ترقی پذیر ایشیا کی الیکٹرانکس اور دیگر تیار شدہ سامان کی برآمدات کی طلب سست روی کا شکار ہے کیونکہ مالیاتی سختی بڑی ترقی یافتہ معیشتوں میں معاشی سرگرمیوں کو متاثر کر رہی ہے۔

ایشیا بحرالکاہل کے خطے کے ترقی پذیر ایشیا  میں 46 معیشتیں شامل ہیں جن میں جاپان ، آسٹریلیا اور نیوزی لینڈ شامل نہیں ۔

ایشیائی ترقیاتی بینک کی رپورٹ میں کہا گیا ہے کہ آئندہ سال کے لیے خطے کی شرح نمو کی پیش گوئی اپریل کے 4.8 فیصد کے تخمینے سے معمولی طور پر کم کرکے 4.7 فیصد کردی گئی ہے۔

ایشیائی ترقیاتی بینک نے کہا ہے کہ ایندھن اور خوراک کی قیمتوں میں کمی کے باعث افراط زر میں کمی کا سلسلہ جاری رہے گا جو وبائی امراض سے قبل کی سطح پر پہنچ جائے گا۔